මනුෂ්‍යයකු උවමනාය....

නිවැරදි හෝඩුවාවක් දැනුම්
දෙන්නෙකු වෙත දිවි ඇතිතාක් 
හෘදයාංගමව ණයගැති වන්නෙමි.
තැන සොයා ගෙන පැමිණ 
හමුවන්නෙමි.....


මනුෂ්‍යයකු උවමනාය
උගත් ද නූගත් ද යන වග

පොහොසත් ද දුප්පත් ද යන වග

සුරූපී ද විරූපී ද යන වග

ලාබාලද වැඩිමල් ද යන වග

ගැහැණියද පිරිමියාද යන වග

සහ තරාතිරම

තුට්ටුවට සලකනු ලැබේ....

දුෂ්ටයකු කුහකයකු දුබලයකු

මෝඩයකු පිස්සෙකු හෝ 

නෝවැදගතෙකු නම් වඩාත් සුදුසු ය,

මන්ද යත් මා ද එබඳු බැවිනි.

එහෙත් තමන් එබඳු බව අවංකවම 

දන්නා අයෙකු විය යුතුයි..

මනුෂ්‍යයකු උවමනාය.

තමා මනුෂ්‍යයකු බව දන්නා අයෙකු

විය යුතුය. අන්‍යයන් ද මනුෂ්‍යන් බව

අමතක නොකරන්නෙකු විය යුතුය.

කූට බුද්ධිය හිමි කරගනු පිණිස ද

හදවත බිලි දී නැති අයෙකු විය යුතුය.

රොබෝවරයෙකු නොවිය යුතුය.

ඇවිදින මළ මිනියක් නොවිය යුතුය.

උන්නතිකාමය විසින් නටවනු ලබන

පඹයකු නොවිය යුතුය.

මව් භාෂාවන් වැටහෙන අයෙකු විය

යුතුය.

නොහොත්, නොදැනුම හා

අපැහැදිලිකම් සඟවනු පිණිස ගිරා

භාෂාව පරිහරණය කරන්නේකු 

නොවිය යුතුය.

මනුෂ්‍යයකු උවමනාය.

ඔහුව තේරුම් ගැනීම සඳහාය.

හැකිතාක් නිවැරදිව සහ අවංකව ඔහුව තේරුම් ගැනීමට මට ඉඩ දෙන

අයෙකු විය යුතුය.

දෙවියන් වහන්සේව බැහැ දැකීම 

සඳහා ය.

බුදු රදුන් ගේ නිර්වාණීය

ප්‍රීතියෙන් අංශුමාත්‍රයක හෝ භුක්ති

විඳිනු සඳහා ය.

මනුෂ්‍යයකු උවමනාය.

මගේ මතවාදයන් හා විශ්වාසයන් 

ඔහුට කාවැද්දීම සඳහා නොවේ.

ඔහු ගෙන් බොහෝ දේ දැන ගැනීම 

සඳහා ය. මගේ අශෝබන කම්

කුහකකම්, නපුරුකම, මෝඩකම්

වැරදි සහ පිස්සු මට තේරුම් ගැනීම

සඳහා ඔහුගේ සහය ලැබීමටය.

අවශ්‍ය නම් ඔහුට ද මට හැකි එවැනි

සහයක් දීමට කැමත්තෙමි...